1283. Februar 20. Breslau.

Die gekorenen Schiedsrichter beurkunden ihre Entscheidung.

In Nomine Domini Amen. Noverint universi presentes litteras inspecturi, quod exorta inter venerabilem in Christo Patrem et dominum Thomam dei gratia Wratislaviensem Episcopum et fratrem Harthilibum Abbatem de Lubes et Conventum ipsius ex parte una, Ac fratrem Dominicum Prepositum et S. Magistram et Conventum eorundem in Bozhidom Wrat. dioc. ex altera, materia questionis super decimis villarum aut earum parte In Wroblino de septem mansis, in Zhaborou de octo mansis, in Zhuzhel de novem mansis, Tandem partes utreque volentes presens negocium per amicabilem concordiam pocius quam per iudiciorum strepitum terminari, venerabilis in Christo pater dominus Episcopus iam predictus personaliter, dominus vero Abbas de Lubes per Procuratorem idoneum fratrem Ottonem Monachum sue domus Cisterciensis ordinis, Prepositus vero et Magistra ac conventus de Bozhidom per fratrem Rodgerum Monachum domus ipsorum Premonstratensis ordinis Procuratorem eorundem, Procuratoriis exhibitis infra scripti tenoris de verbo ad verbum, in nos fratrem Wilhelmum Monasterii S. Vincencii prope Wrat. Premonstratensis ordinis. et fratrem Nicolaum Monasterii S. Marie ordinis S. Augustini in Wrat. Abbates, et Magistrum Andream Archidiaconum, et Magistrum Hulricum Cantorem Wratislaviensis Ecclesie, tamquam in arbitros, compromissarios, arbitratores seu amicabiles compositores presentes, et arbitrium sponte suscipientes, compromiserunt, et voluntarii sine contradictione aliqua consenserunt, Ita quod possimus pronunciare, examinare et cognoscere, terminare, et diffinitivam sentenciam dare, et ordinare, iuris ordine observato vel penitus pretermisso, ordinarie vel extraordinarie prout nobis melius videbitur expedire, super predictis decimis, de alto et basso, diebus feriatis et non feriatis, sedendo stando, omni hora omni loco, ubicunque et quandocunque, utraque parte presente vel utraque absente, vel una presente et alia absente, at quod arbitrari possimus semel vel pluries, et nostram sentenciam interpretari et corrigere ac moderari, quociens nobis visum fuerit expedire, et contumaciam litigatoris punire, et citare partes ad quemcumque locum vel loca voluerimus, ut possimus pronunciare in scriptis sive sine scriptis, promittentes predicti, dominus Episcopus et Procuratores predictorum Monasteriorum per sollempnem stipulacionem pro se et suis posteris sub pena viginti Marcarum fusi et fini argenti Wrat. ponderis, quod nostro laudo, arbitrio, pronunciacioni seu diffinicioni stabunt ec obtemperabunt, et in nullo contravenient vel de iure vel de facto, verbo vel opere, per se vel per interpositam personam, et quod nullum dolum committent, et quod contra compromissum nullum impetrabunt rescriptum, et nullum privilegium aut consuetudinem allegabunt, nullamque excepcionem opponent, et quod non utentur beneficio alicuius legis aut canonis que viciat aut viciare possit presens compromissum, sive ex personis nostris sive ex personis compromittencium, sive ex rebus super quibus compromissum est, Renunciantes beneficio omnium predictorum, Beneficiis, privilegiis, consuetudinibus, excepcionibus competentibus vel non competentibus, enarratis et non enarratis, et predictis specialiter certificatis, Et hec omnia et singula promiserunt per sollempnem stipulacionem attendere et complere et observare pro se ac suis Successoribus ad invicem stipulando, et non contravenire sub pena predicta et obligacione omnium suorum bonorum, presencium et futurorum, constituentes ad invicem unus pro alio bona possidere, ita quod liceat ei qui servaverit compromissum, sua auctoritate ingredi bona illius qui fecerit contra compromissum, in totum vel in parte, et pena soluta vel non soluta, predicta omnia et singula et dictum compromissum in sua remaneant firmitate. hoc adiecto, quod dicta pena semel et pluries et quociens contra predicta vel aliquod horum in omnibus et singulis quampluries ventum fuerit a quacumque parcium predictarum arbitrium non servando, in solidum committatur, et commissa sine contradictione qualibet exigatur. Et in signum consensus in nos dominus Episcopus predictus sui Sigilli munimine, et nos una cum eo ne nostra iurisdictio delusoria videatur, ad perpetuum robur et eternam rei memoriam nostris Sigillis presentem litteram roboramus. Actum in Wrat. presentibus dominis, Magistro Petro Plebano de Legniz, fratre Swantoslao de S. Maria in Wrat. ordinis S. Augustini, Stanislao Procuratore de Vyazd, Smilone Plebano de Lucina, Nicolao de Odriza Cive Wrat. Fratre Johanne cum socio suo de ordine fratrum Predicatorum, et aliis quam pluribus, Anno Domini M° CC° lxxx° tercio, Indictione undecima. X. Kal. Marcii.
Sequitur Procuratorium sive tenor eius de verbo ad verbum domini Abbatis de Lubes, de quo facta est superius mencio circa principium compromissi. Sequitur tenor de verbo ad verbum insertus Procuratorii Prepositi et Magistre ac Conventus de Bozhidom.
Sequitur tenor sentencie Laudi sive arbitrii a nobis in scriptis publice promulgati.
Nos predicti domini, Abbates, Archidiaconus, et Cantor, arbitri, arbitratores, compromissarii, seu amicabiles compositores, in nos recepto sponte ac libere compromisso, utraque parte presente per se sive Procuratores idoneos et sponte consencientes, et sub stipulacione et obligacione supradicta promittente, quocienscumque aliqua parcium venerit contra compromissum predictum, nobis dabit decem Marcas, et parti alteri servanti arbitrium decem Marcas, predicti compromissi auctoritate seu iurisdictione in nos prout patet a partibus prorogata, auditis et intellectis meritis cause et parcium assercionibus equa iusticie lance prout poteramus melius discussis equo libramine racionis, percepta prius per se cuiuslibet voluntate quid posset sine dampno maximo acceptare, utraque parte petente instanter diffinitivam sentenciam promulgari, consilio habito cum maxima maturitate. arbitramur, pronunciamus, diffinimus, sentenciamus, ordinamus, seu promulgamus in hunc modum, quod dominus Episcopus et Abbas de Lubes debent habere decimas sex mansorum in Wroblino, et in Zhaborow octo mansorum. Conventus vero Domus dei sive de Bozhidom debet habere decimas in Zhuzhel decem et octo mansorum mensuratorum ibidem, in quorum numero ipsorum mansi qui pertinent ibidem ad eorum grandiam, includentur. Cui sentencie, diffinicioni, atque arbitrio, sive pronunciacioni, utraque pars sponte consensit incontinenti, et ipsam voluntarie ac libere acceptavit.
Actum eodem anno, mense et die, quo et compromissum, et eisdem testibus presentibus. Magistro Petro predicto, et ceteris.

Von dieser Urkunde hat sich sowohl die Czarnowanzer wie die Leubusser Ausfertigung erhalten; an jener hängen die Siegel an besonders schoner bunter Seide, an dieser sind sie nur durch Pergamentstreifen befestigt. Die Umschriften sind: 1) † S. THOME. DI. GRA. WRATISLAVIEN. EPI. 2) † S. ABBIS. ECCLE. SCI. VINCENCII. 3) † S. ABBATIS. SCE. MARIE. IN WRAT. 4) † S. ARCHIDIACONI. WRATIZLAVIE (mit einer Darstellung der GeburtChristi). 5) † S. MRI. WLRICI. CANONICI. WRATIL. Darauf ist die Krönung der Jungfrau dargestellt, mit einer anbetenden Figur darunter.
Hugo, I, 486.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.